"ناس و ناس"

في الشارع ، وفي البيت، وفي العمل
فيه ناس عسل وناس بصل
وناس تخاف في حياتها من الفشل
وناس محتاجه لدفعه و شوية أمل
وناس فاضيه ،ماهمها فشل
وناس حاطه همها في العمل
وناس زعلانه ونجمها أفل
وناس راضيه ، وما تشتري بالأجل
وناس بايخه ترمي وراها قلل
وناس طفشانه وزهقانه ملل
وناس ساكنه في قصور وفلل
وناس مليانه بلاوي وعلل
وانت يابن الناس كلك أمل
لاتقلد الناس ، ماانت على عجل
ترى راضين بك مهما حصل
من غير لوم ولاعتاب و زعل!

"أنا وانت"

كل الأحبه اتنين اتنين
وأنا وإنت أكتر من الإتنين
أهلي وأهلك وأرحام الطرفين
وأنا وإنت نراعي الجنبين!

مومهم ، المهم إنت فين
عطاك وفى وكفى الميلتين
ياريت منك في الأنام اتنين
والخير يقعدلك على الصفين!

الحياه كلها سلف ودين
ولمن تطعم الفم تستحي العين
المهم في الأخير إحنا الاتنين
على الحلوه والمره عايشين!

"يام الطرحه"

ياحلوه يام الطرحه،
والعبايه الكشخه،
والشنطه زي الجزمه،
حني علي بنظره،
فيها الأمل لبكره،
وكمان طمعان في بسمه،
تدخل في قلبي الفرحه،
ومن غير ما تقولي كلمه،
أعرف جوابك فجأه،
وأروح أجيب الشبكه!

"الناس اتشابهت"

البلاد اختلفت واللغه اختلفت
بس الناس اتشابهت والتصرفات اتطابقت!

الأسامي اختلفت والصور اختلفت
بس القياده اتشابهت والنفوس اتطابقت!

الأماكن اختلفت والأحلام اختلفت
بس الأحوال اتشابهت والظروف اتطابقت!

البضاعه اختلفت والمحلات اختلفت
بس الأسعار اتشابهت والشكاوى اتطابقت!

العقول اختلفت والحلول اختلفت
بس المشاكل اتشابهت والعلل اتطابقت!

الدنيا اختلفت والهموم اختلفت

بس المآسي اتشابهت والدعاوي اتطابقت!

" الأخوه"

الأخوه في الدنيا و بس
لكن اللي مايعرف يقول عدس
و توديه في داهيه شوفة النفس

وبعدين يفوق على الهلس!

"الدنيا اتغيرت"

الدنيا اتغيرت وانقلبت واتبدلت،
والماده طغت وحكمت وعدلت،
والقرش صار له كلمه والناس اتبهدلت،
والحياه صارت صعيبه والقلوب اتعلعلت!

"وحيد"

وحيد لا صاحب ولا صديق،
ولا أخ ينفعه وقت الضيق،
هو اللي فرط في الحبيب وفي الرفيق،

وبماله اشترى بس الرقيق!

" مرة الولد"

قالوا مرة الولد ضره،
قلت المحبه دوا المره،
قالواهدا كلام فاضي بالمره،
قلت المحبه من غير عشم تأسر الحره!

"أسره في بيت"

أسره في بيت مضمومه،
لكن القلوب مفرقه ومحرومه،
الكل عايش مع بعض صوره،
كإن البيت أوتيل بغرف مسكونه!

"بره البيت"

بره البيت تشوف البسمه،
وجوه البيت تلاقي الكشره،
صباح ومسا وعند الغفوه،
فين المحبة والموده ولاحتى الرحمه!

"كشف الهيئه"

عبايه وجزمه وشنطه
هدا هو كشف الهيئه
وراس مال الست للخرجه
وسن بفص ألماس يحلي البسمه!

"البنات والحنان"

البنات محتاجه للحنان
وتجري ورا الكلام الحلو بجنان
وتعطي الحب بالمجان

للي يسوا واللي مايسوا كمان!

" اللجوء لله "

جسم الإنسان بحمله ينوء
والنفس أماره بالسوء
والواحد لازم يحاسب نفسه بهدوء
ولكتاب الله يكون اللجوء!

" الأ نا "

الأ نا عليت في البشر
والقلب صار أقسى من الحجر
وكل واحد شايف نفسه قمر
وغيره قطره في بحر!

" العند "

العند عبط وماهو بشي زين
وصاحبه لبط ومو عارف الحق فين
لازم كلمته تكون على الراس والعين
بس كده! قراحه وبجاحه وشين!

"الأهل والأولاد"

ماحد يعلم الأولاد الحب غير أهلهم
وإذا كان الخصام للأهل زادهم
الحقد والكره يصيروا جيرانهم
والشر والقطيعه ، دول خلانهم!

" اعتذر"

بلا لف ولا دوران اعتذر
ما ينقص من قيمتك ولا تفتكر
إن الناس يشوفوك منكسر
تراك في عين الناس مقتدر!

" السلام لله "

ترى السلام لله ماهو لأحد
ياإما بوس وأحضان يامافي سلام أبد
لا تخلي للشر في نفسك أمد
وسلم ومو ضروري تبوس أحد!

" قالوا"

قالوالها حلوه ، اتبسمت
قالوالها نحفت ، اتعجبت
إنه الرجيم باين عليها، اتجملت
ياستي فيقي ترى آخرتها اتحسرت!

" الحلا "

ترى الحلا ماهو بدايم
وكلام الناس على المجاملات قايم
والجو يحلا ولو كان غايم
والحلو طبعك حتى ولوكنت نايم!

" الملافظ سعد"

الملافظ سعد مايحتاج لها وعد
ولا تزويق في الكلام ولافرد
بس الأدب وحسن الرد
والخوف من التجريح بغير قصد!

" الكدب"

الكدب ماهو بعادتها
بس حبت تلمع صورتها
كدبه فكدبه صارت عادتها
لدرجة إنها صدقت كدبتها!

" الشر "

كان الشر مستخبي ويترسم بتحميره
لكن فراغة العين خلت الشر تصبيره
المشكله مو في العين ولا في التدويره
المشكله في عين حسوده والنظره منها تعويره

"واسطه"

قليل الخبره وماعندي واسطه!
ايش أسوي وحيلتي ماهي واسعه؟
عقده ماتنحل ومحاولاتي ماهي نافعه!
ياشيخ اتوكل وخلي ربك هو الواسطه!

" قالوا و قلنا"

قالوا وقلنا حتى في الأمثال،
ياترى متى نخلص من القيل والقال!
كل واحد يبدأ بنفسه في الحال،
يقول خير ولا يعطي للفتنه مجال!

"لقفه"

فلان ملقوف ، طيب داه طبعه!
بس إنت وأنا نبغى نصير شرحه!
فرمل ياعم دحين ، أحسن نصير ربعه!
ترى اللقفه شينه وماهي شي له نفعه!